তেওঁ ক্ৰিজত থকা মানেই বিপৰীত পক্ষৰ বলাৰ বাবে আছিল মূৰৰ কামোৰণি। বাউন্সাৰ, য়ৰ্কাৰ, শ্বৰ্ট, ছুইং যি বলেই নহওঁক কিয় অতি নিৰ্দয়ভাৱে প্ৰহাৰ কৰিব পাৰিছিল তেওঁ- যাৰ বাবে প্ৰায়েই বিপাঙত পৰিছিল প্ৰতিপক্ষৰ বলাৰসকল।
বহু যুঁজৰ নায়ক আছিল তেওঁ। বিশেষকৈ এদিনীয়া আৰু টি-২০ ক্ৰিকেটত তেওঁ অষ্ট্ৰেলিয়ালৈ আগবঢ়াইছে অনবদ্য অৱদান। বিশ্বকাপতো তেওঁৰ প্ৰদৰ্শন আছিল সন্তোষজনক। একেদৰে হাতত বল তুলি লৈয়ো সফলতা অৰ্জন কৰিছিল তেওঁ। সেয়ে তেওঁৰ ওপৰত ক্ৰিকেট অষ্ট্ৰেলিয়াৰ আছিল যথেষ্ট আস্থা।
পিছে এতিয়াৰে পৰা আৰু তেওঁক দেখা নাযাব অষ্ট্ৰেলিয়াৰ জাৰ্চিত। দেখা পোৱা নাযাব কেংগাৰু বাহিনীৰ ড্ৰেচিং ৰুমত। আন্তৰ্জাতিক ক্ৰিকেটক বিদায় জনাই গ্লেন মেক্সৱেলে কৰিছে অৱসৰ ঘোষণা। সোমবাৰে তেওঁ আন্তৰ্জাতিক ক্ৰিকেটৰ পৰা অৱসৰ গ্ৰহণৰ কথা আনুষ্ঠানিকভাৱে ঘোষণা কৰে।
উল্লেখযোগ্য যে, ৩৮ বছৰীয়া মেক্সৱেলে দেশক প্ৰতিনিধিত্ব কৰি খেলিছে ১৪৯ খন এদিনীয়া মেচ আৰু ১৩০ খন টি- ২০ মেচ। অৱশ্যে টেষ্ট ক্ৰিকেট খেলিছিল মাত্ৰ ৭খন। তাৰোপৰি ২০১৫ আৰু ২০২৩ৰ এদিনীয়া বিশ্বকাপতো দেশক কৰিছিল প্ৰতিনিধিত্ব। একেদৰে ২০২১ৰ টি-২০ বিশ্বকাপ দলতো আছিল তেওঁ।
এদিনীয়া সংস্কৰণত তেওঁ সংগ্ৰহ কৰিছে ৩,৯৯০ ৰান আৰু টি-২০ত ২,৮৯৭ ৰান। তেওঁৰ নামত আছে ১৩৬টা আন্তৰ্জাতিক উইকেট।











