গোসাইগাঁও মহকুমাৰ অসম-বংগ সীমান্তৰ মাজেৰে বৈ যোৱা সোণকোষ নদীৰ মাছ খাই শনিবাৰে একেটা পৰিয়ালৰ শিশু-মহিলাসহ চাৰিগৰাকী লোক অসুস্থ হৈ চিকিৎসাধীন হৈছে ৷ অসুস্থ লোক সকল গোসাইগাঁও মহকুমাৰ মাণ্ডাৰীয়া গাঁৱৰ বাসিন্দা অন্যাৰ বসুমতাৰী (৫৬), ঝৰ্ণা বসুমতাৰী (২২), হায়ানচৰ বসুমতাৰী(১২) আৰু লালিনা বসুমতাৰী(৫) বুলি চিনাক্ত কৰা হৈছে ৷
অসুস্থ কেইজনক ততাতৈয়াকৈ কচুগাঁও চিকিৎসালয়ত ভৰ্তি কৰা হৈছে ৷ উল্লেখ্য যে চুবুৰীয়া ৰাষ্ট্ৰ ভূটানত ২৯ অক্টোবৰত হিমবাহৰ হ্ৰদ বিস্ফোৰণৰ পাছত সোণকোষ নৈৰে পাহাৰীয়া অঞ্চলৰ পৰা ঘোলা পানী বৈ আহে আৰু গোসাইগাঁও মহকুমাৰ সীমান্ত এলেকাত বানৰ আশংকাৰ সৃষ্টি হৈছিল ৷ অৱশ্যে সিদিনা নিশাৰ ভাগতে পানী কমি যায় যদিও ৩০ অক্টোবৰ সন্ধিয়াৰ পৰা সংকোষ নদীত মাছৰ উজান উঠিছিল ৷
পাহাৰীয়া অঞ্চলৰ পৰা নামি অহা ঘোলা পানীত হাজাৰ হাজাৰ মৰা আধমৰা মাছ ভাহি আহে৷ ইয়াৰ খবৰ পোৱাৰ লগে লগে ৰাইজে সোণকোষ নদীত মাছ মাৰি আনে আৰু ভক্ষণ কৰে ৷ ইপিনে এই মাছ ভক্ষণ কৰিলে স্বাস্থ্যজনিত সমস্যা হোৱাৰ আশংকা থাকিব পাৰে বুলি জিলা প্ৰশাসনে এই মাছ ধৰা বা খাবলৈ নিষেধাজ্ঞা জাৰি কৰিছিল যদিও একাংশ লোকে উক্ত মাছ ভক্ষণ কৰে ৷ ইয়াৰ পাচতে একেটা পৰিয়ালৰ চাৰি গৰাকী লোক অসুস্থ হৈ পৰাৰ লগতে মহকুমাখনৰ আৰু কেবাজনো অসুস্থ হোৱাৰ বাতৰি পোৱা গৈছে ৷











